Delivery boy, nagpa-blotter matapos ginaalegar gintayaan sang armas-luthang sang iya kaupod sa inom

ROXAS CITY – Nagpa-rekord sa Roxas City Police Station ang isa ka delivery boy agud ireklamo ang isa ka lalaki nga ginaalegar nagpangtaya sang armas-luthang sa iya.

Ginkilala ang tagreklamo nga si Ricky Barrieta, 40 anyos sang Malipayon Village, Barangay Tiza, Roxas City.

Base sa ginparekord ni Barrieta, samtang sila ang nagainom ni Manuel Bofil, 31 anyos sang Hemingway Street, sang nasambit nga barangay, hinali na lamang sila nga nagbaisay rason nga nagdesisyon na lamang siya nga magpauli.

Apang sang kuhaon na kuntani ni Barrieta ang iya tricycle, ginpalapitan ini ni Bofil kag gintayaan sang .38 calibre nga armas-luthang.

Bangud diri, ginpakamaayo na lamang ni Barrieta nga iparekord sa pulisya ang natabo.