ROXAS CITY – Kasubong nga na-trauma ang delivery rider nga na-biktima sang faKe booking/transaction sa syudad sang Roxas.
Ginpahayag ni Rendy Dacibar Desales, 28-anyos sang Alvarez Subdivision, Barangay X, Roxas City nga wala ini naghuna huna nga ma-biktima sang manughingalit nga persona sa una nga adlaw nga pagtrabaho bilang delivery rider.
Suno sa panaysayon ni Desales nga nakabaton ini sang transaction gikan kay Madam Amanda sa diin nagapabayad ini sang bills sa isa ka 24/7 convenient store nga nagalab-ot sa P765.
Nahibaluan nga sa nasambit nga kantidad makaganar si Desales sang P140.
Matapos makabayad sa isa ka 24/7 convenience store, gilayon nagpadulong sa isa ka hotel sa nasambit nga barangay ang rider dala ang resibo nga ginbayaran sini.
Naghulat ini sang kapin 45 minutos apang wala sang may nagpanaug kag nagguwa nga persona nga nakapangalan kay certain Ma’am Amanda.
Ginpakamaayo na lamang sini nga iparekord sa pulisya ang natabo.
Sang mahibaluan naman sang kumpaniya ang natabo kay Desales, ginpanugyanan lamang ini nga maghalong agud indi na liwat mabiktima sang manugtunto nga tawo.
Nahibaluan nga ginhulam lamang sini ang masobra P700 nga gingamit sa pagbayad sang bills agud makabaton sang booking apang malas nga nabiktima pa ini.
