PONTEVEDRA, CAPIZ – Kasubong nangin grasya sa iban nga mga pumuluyo ang natabo nga disgrasya sa Barangay Binuntucan, Pontevedra, Capiz kun sa diin nagbaliskad ang isa ka delivery truck nga may karga nga binanyera sang isda.
Mahibaluan nga kasunod sang pagbaliskad sang nasambit nga trak ang pagdinaguso man sang mga tawo agud magkuha sang isda nga ‘tuloy’ kag mangin ang pila ka mga banyera ang gindala pa sang mga ini pauli.
Suno kay Police Corporal John Altamia, imbestigador sang Pontevedra Municipal Police Station, sa ila nga pagpangusisa nahibaluan nga gikan sa Estancia, Iloilo ang nasambit nga binanyera sang isda kag natalana kuntani nga ibulad sa siyudad sang Roxas agud himuon nga uga ukon dried fish.
Ginapahayag nga nadulaan sang kontrol sa manubela ang driver nga si Ebenezer Basco, 59 anyos sang Barangay Malayuan, Ajuy, Iloilo rason nga nagbaliskad ang nasambit nga trak sa dalan.
Nag-angkon sang menor nga pilas ang driver nga si Basco kag ang sakay sini nga pahinante nga si Fernando Sumilhig, 41 anyos sang Barangay Bantigue, Bantayan, Cebu.
Nagalab-ot tanan sa halos 150 ka mga banyera sang isda ang karda sang nasambit nga delivery truck.
