Ginakabig nga harassment sang alkalde sang banwa sang President Roxas ang pagpadala sang demand letter ni Atty. Atlas Catalan sa tenants sang mga stalls sa merkado publiko kalakip sa Local Government Unit sang banwa.
Ginpahayag ni Mayor Receliste ‘’Tanoy’’ Escolin kasubong ginapahog ni Catalan ang mga tenants sang mga stalls sa merkado publiko sang magpadala ini sang demand letter sa mga natungdan sa diin ginahatagan sang 15 diyas nga plaso ang mga negosyante nga bakantehon ang lugar, bangud kun magpakatig-a sila posible nga pasakaan sila sang panumbungon.
Aminado man ang opisyal nga indi lamang mga vendors ang ginpadalhan sang demand letter bangud nakabaton man sang final demand letter ang alkalde gikan kay Catalan nga nagpahanumdum angut sa civil case nga ginpasaka batuk sa LGU.
Apang ginpahanumdum ni Escolin si Catalan nga wala pa sang complaint nga ginpasaka ang pamilya Locsin sa pamunuan sang banwa.
Ginapanindugan pa sang alkalde nga propedad na sang LGU sang President Roxas ang duta nga ginatindugan sang ila public market sa diin pamatood diri ang ginauyatan nga dokumento sang banwa.
Samtang nagpanugyan si Mayor Escolin sa mga stall owners nga nakabaton sang demand letter nga magpablotter sa istasyon sang pulisya kag i-sumiter sa munisipyo ang demand letter bangud sila ang maga-akto.
Nahibaluan man nga ila na ginatun-an sang iya abogado ang pagahimoon nga tikang kag pagasabton ang demand letter sa masunod nga mga inadlaw.
