ROXAS CITY – Madasig nga nagtaas ang numero sang balatian nga Dengue sa probinsya sang Capiz.
Ini ang ginpahayag ni Mr. Joeffrey Espiritu, Information Officer sang Department of Health-Capiz, sang mainterview sang Bombo Radyo.
Suno diri, kun ikumparar ang datos sang nagligad nga tuig sa kapareho nga bulan, nagtaas sang 101% ang kaso sang Dengue sa probinsya.
Sa karon, may yara sang 262 ang aktibo nga kaso sang balatian nga Dengue nga padayon sa karon ginatatap sa mga ospital, maayo lamang nga wala sang nabalhag nga casualty.
Ini amu ang mga masunod: Cuartero-10; Dao-17, Dumalag-3; Dumarao-3: Ivisian-5: Jamindan-71; Maayon-8; Mambusao-5; Panay-8; Panit-an-2; Pilar-4; Pontevedra-3; President Roxas-5; Roxas City-99; Sapian-10; Sigma-3; kag Tapaz-6.
Suno man kay Espiritu nga wala sang ginapili nga pamugaran ang mga lamok nga may dala nga balatian nga Dengue, apang kadam-an sa mga may kaso sang nasambit nga sakit ang nabalhag sa mga kabanwahan, ukon syudad nga masami nagatumpok ang tawo.
Liwat nga pahanudom ni Espiritu nga ipabilin ang mamala kag matinlo nga palibot agud malikaw sa Dengue, subong man, magpadulong sa Doctor sa tion nga makaeksperyensiya sang isa ka semana nga lagnat kag pag-angkon sang rashes.
