ROXAS CITY, CAPIZ — Ginapabaskog sang City Health Office ang pagmonitor kag mga tikang batok sa dengue sa Roxas City, bangud nagdangat na sa 117 ang na-record nga dengue cases, lakip ang isa ka kumpirmado nga mortality case.
Sa interview sang Bombo Radyo Roxas kay Cisa Loyola, Surveillance Officer sang City Health Office, iya ginpahayag nga bisan masami nga ginakabig nga peak season sang dengue ang tion sang ting-ulan, ilabi na halin Hunyo tubtob Agosto, mahimo gihapon maglapta ang sakit sa bilog nga tuig.
Suno kay Loyola, mas nubo pa sa subong ang dengue cases kumpara sa pareho nga tion sang nagligad nga tuig. Apang padayon gihapon ang pagmonitor bangud ang mga lamok nga Aedes aegypti kag Aedes albopictus, nga nagadala sang dengue virus, mahimo magpadamo sa mga lugar nga may nagatipon nga tubig sa sulod kag guwa sang mga panimalay.
Ginkilala man sang City Health Office ang Barangay Baybay, Loctugan kag Inzo nga may dengue clustering, nga nagakahulugan nga may mga na-record nga kaso sa sulod sang tatlo ka sunod-sunod nga semana.
Ginapatuman man ang dengue vector surveillance sa mga barangay, lakip ang Tiza kag Milibili, kun sa diin ginakuha ang mga sample sang kitikiti kag ginadala sa laboratoryo para mahibaluan ang klase sini. Sa monitoring, ang Barangay Milibili ang may pinakadamo nga na-record nga kitikiti.
Samtang, suno pa kay Loyola, halos tanan nga age group mahimo maapektuhan sang dengue, apang mas madamo ang kaso nga nakita sa 10 tubtob 19 anyos nga grupo.
Ginpahanumdom niya ang publiko nga indi lamang mag-obserbar sa mga ginapatuman nga clean-up drive, kundi magbulig mismo sa pagpangita kag paglaglag sang mga lugar nga mahimo pamugaran sang lamok.
Gani, padayon ang panawagan sang health authorities sa publiko nga mangin mabinantayon kag maghimo sang tikang sa sulod mismo sang ila mga panimalay kag komunidad.
