ROXAS CITY – Nagdeklarar na sang dengue outbreak ang gobernador sang Capiz kasunod sang padayon nga pagtaas sang balatian nga dengue sa probinsya.
Pinaagi sa Executive Order No. 001 nga pirmado ni Governor Esteban Evan “Nonoy” Contreras gindeklara na ang dengue outbreak sa probinsiya.
Ginpahayag ni acting provincial administrator Dr. Edwin Monares nga nasaad sa nasambit nga executive order nga suportado sang lokal nga gobyerno sang probinsya ang pagpabulong sa mga pasyente nga nagasuprer sang balatian nga dengue.
Base sa pinakaulihi nga datos sang Provincial Health Office (PHO) may yara na sang masobra 2,177 dengue cases kag 14 na ang napatay humalin sang Enero tubtob sini nga bulan sang Hulyo.
May yara man sang 771% nga pagtaas sang dengue cases sa amo nga period kun ikumparar sang tuig 2018.
Bangud diri, magapatigayon na sang clean up drive ukon 4’oclock habit kada Sabado nga adlaw sa mga kabaranggayan sa diin pangunahan sang mga barangay officials ang pagpaninlo sa palibot agud matapna ang mga lamok nga may dala nga dengue.
May yara naman sang kabug-osan nga 339 ka mga pasyente ang na-admit sa karon sa Roxas Memorial Provincial Hospital sa diin 120 diri ang positibo sa dengue sa diin may yara lamang sang 147 ka bed capacity ang RMPH.
Magluwas diri, may yara man sang mga pasyente ang confined sa mga pribado nga ospital.
Mahibaluan nga ang probinsya sang Capiz ang nagapangaduha sa Rehiyon 6 nga may yara sang pinakamadamo nga kaso sang amo nga balatian.
