Ginaduso sang Department of Environment and Natural Resources ukon DENR-Capiz ang paghatag sang protected status sa Gabuc Mangrove Wetland and Bird Sanctuary sa isla nga barangay Gabuc, Pontevedra, Capiz, matapos ang mataas nga waterbird count nga na-record sa lugar.
Sa interview sang Bombo Radyo kay Dr. Ernest Federiso, Provincial Environment and Natural Resources Officer kag Officer-in-Charge sang DENR-Capiz, iya ginpahayag nga importante nga maprotektahan ang wetland bangud indi lamang ini puluy-an sang nagkalain-lain nga klase sang mga pispis kundi importante man sa aquatic resources kag biodiversity.
Suno kay Federiso, ang mangrove vegetation sa Gabuc nagahatag sang natural nga habitat, shelter kag breeding grounds para sa wildlife, samtang ang mga waterways sa lugar nagasuporta sa nagkalain-lain nga species nga nagasalig sa wetland para sa ila pagpadayon.
May daku man nga papel ang mangrove ecosystem sa pag-atubang sang climate change bangud nagaserbe ini bilang carbon sink ukon natural nga nagasuyop kag nagatipig sang carbon dioxide gikan sa atmosphere.
Samtang, may yara na sang Gabuc Mangrove Wetland and Bird Sanctuary Management Plan 2024–2034 nga nagalatag sang mga tikang para sa pagprotekta, pagkonserba, pagmonitor kag pagmintinar sang kahimsog sang wetland.
Dugang pa sang natungdan, ang paghatag sang protected status sa Gabuc Wetland mangin dugang nga tikang para masiguro ang malawig nga pagpreserbar sang isa sa importante nga natural ecosystems sang Capiz.
