Ginpakigbahin sang Department of Environment and Natural Resources (DENR), ang katuyuan sang Permitting on Wheels program para sa mas madasig nga serbisyo sa publiko.
Sa interview sang Bombo Radyo kay Engr. Anne Marie A. Delariarte, Officer in Charge Regional Director, Environmental Management Bureau “EMB” Region 6, iya ginpahayag nga kabahin sa mangin serbisyo sang Environmental and Natural Resources (ENR) laws, Processing of Geohazard Investigation Report (GIR), Environmental Compliance Certificate and Certificate of Non-Coverage Processing “ECC and CNC”, Discharge Permit/ Permit to Operate/ Pollution Control Accreditation, Hazardous Waste Generator ID, Self-Monitoring Report/ Compliance Monitoring Report kag Solid Waste Management nga magahatag sang serbisyo nga kun sa diin mapadali ang pag proceso.
Suno kay Delariarte, magalibot sa tagsa ka probinsya kag komunidad ang amo nga programa agud mapalapit ini sa publiko kag malikawan ang kalawig sang paghulat kag pagbiyahe sang aplikante pakadto sa ila regional office.
Pahayag pa niya, daku ang bulig sang programa ilabi na sa mga negosyo, lokal nga panguluhan kag iban pa nga stakeholders bangud mas mapahapos ang pagkuha sang impormasyon, konsultasyon kag pagproseso sang mga kinahanglanon nga permit kag dokumento nga may kaangtanan sa environmental compliance.
Nagpanawagan man sang natungdan nga magsunod sa tagsa ka layi nga ginapatuman sang DENR agud indi mabudlayan sa pag proseso agud malikawan ang paglapas sa environmental laws.
