Nagpaandam ang Department of Environment and Natural Resources (DENR), nga posible nga maatubang sang pungsod ang ginatawag nga “water bankruptcy” bangod sa padayon nga kakulang sang suplay sang malimpyo nga tubig.
Suno sa ahensya, ipatuman nila ang filtration kag desalination systems sa 59 ka barangay sa mga probinsya sang Masbate, Cebu, Bohol, kag Palawan, lakip na ang iban pa nga lugar nga may kakulang sang tubig.
Plano man sang DENR nga tapuson ang 11 ka spring water systems nga may micro-hydropower component, nga magahatag sang tubig kag enerhiya sa komunidad.
Magahatag man sang pinansyal nga bulig ang gobyerno sa 13 ka water districts agud mapalapad ang ila serbisyo sa mga wala pa maabot nga barangay.
Ang kabug-osan nga proyekto nagabalor sang P256.9 milyon kag ginapaabot nga makabulig sa kapin 220,000 ka residente.
Ginpahayag man sang DENR nga nagdamo na ang groundwater-stressed areas sa pungsod kag madamo sa mga suba ang nagaabot na sa ila limitasyon, rason nga ginatawag ini nga krisis sa tubig.
Sa pihak sini, padayon ang ahensya sa pagpangita sang solusyon pareho sang pag-ani sang stormwater kag pagpasangkad sang water monitoring, agud masiguro ang padayon nga suplay sang tubig sa mga komunidad.
