Ginpasidunggan sang Department of Environment and Natural Resources (DENR) ang Provincial Environment and Natural Resources Office (PENRO) Capiz bilang Best Performing Lawin Team Rank No. 1 sa bug-os nga Region VI sa ginhiwat nga Environment Month Culmination Program sa Passi City, Iloilo.
Sa interview sang Bombo Radyo kay Dr. Ernest C. Federiso, Officer-in-Charge sang PENRO Capiz, iya ginpahayag nga nabaton nila ang pagkilala bangud sang maayo kag epektibo nga pagpatuman sang Lawin Forest and Biodiversity Protection System sa bug-os nga tuig sang 2025.
Suno kay Federiso, nangin importante nga basehan sang ila kaladag-an ang padayon nga pagbantay sa mga kabukiran, kag ang madasig nga pag-tikang sa pagtamod sa posible nga makaguba sa biodiversity.
Nagalaum man ang ahensya nga ang sini nga kadungganan mangin inspirasyon sa ila nga padayon nga pagpasangkad sang kabukiran para sa palaabuton nga mga henerasyon.
