Nagpahayag sang suporta ang Department of Environment and Natural Resources sa pagpatigayon sang Capiz El Niño Task Force sa idalom sang Executive Order No. 31, Series of 2026, nga ginpirmahan ni Capiz Governor Fredenil H. Castro.
Sa interview sang Bombo Radyo kay Dr. Ernest C. Federiso, Officer-in-Charge sang Provincial Environment and Natural Resources Office (PENRO) sang Department of Environment and Natural Resources (DENR) , iya ginpahayag ang importansya sang pagbinuligay sang nagkalain-lain nga ahensya sang gobyerno sa pagpanghanda sa posible nga epekto sang Super El Niño, ilabi na sa suplay sang tubig kag pagpreserbar sang natural resources sang probinsya.
Suno kay Federiso, gintukod ang task force agud magkoordinar sang mga tikang sa pagpanghanda kag pagpauntat sang posible nga epekto sang malawig nga pagsalop sang init, kakulang sang ulan, kakulang sang tubig kag posible nga pagkalugi sa agrikultura.
Pahayag pa niya, kabahin sang ginaplano nga aksyon ang pag-assess sang available nga suplay sang tubig, pag-imbentaryo sang mga water source kag imprastraktura, kag pag-ila sang mga lugar kag sektor nga mas delikado sa epekto sang El Niño.
