ROXAS CITY – Ginkaalarma sang Department of Labor and Employment ukon DOLE-Capiz ang namonitor nga madata nga kaso sang Child Labor ukon pagpatrabaho sa mga menor-de-edad sa probinsiya sang Capiz.
Suno kay DOLE-Capiz Head Cecile Acebuque, kasunod sang ila ginpatigayon nga profiling kag validation, tatlo ka mga banwa sa probinsiya ang may madata nga kaso sang pagpatrabaho sa mga menor-de-edad.
Kalakip diri amo ang banwa sang President Roxas, Panit-an kag Maayon sa diin ginapilit ang mga kabataan nga magtrabaho sa kampo.
Angut diri, ginpahayag ni Acebuque nga indi dapat ini pag-itolerar bangud nagalapas ini sa Republic Act 7610 ukon Anti-Child Abuse Law.
Bangud diri, nagpakig-angut na ang ahensiya sa Department of Social Welfare and Development ukon DSWD kag Philippine National Police agud dalayon na nga matapna ang child labor sa probinsiya.
