Gin-lift na sang Department of Agriculture (DA) ang import ban sa pag-angkat sang poultry products gikan sa New Zealand matapos ideklarar ang nasambit nga pungsod bilang free na sa bird flu.
Pinaagi sa Memorandum Order No. 62, ginpahibalo sang Department of Agriculture ang pagbalik sang importasyon sang mga produkto sang manok, lakip na ang karne sang manok, day-old chicks, itlog, kag semilya halin sa New Zealand.
Ini nga direktiba ginpagwa matapos mapamatud-an nga ang New Zealand wala na sang kaso sang highly pathogenic avian influenza isa ka seryoso kag masami makatalapon nga balatian nga naga-epekto sa mga hinuptanan nga manok kag iban pa nga klase sang pispis.
Suno sa memorandum sang ahensya, ang ginpatigayon nga risk assessment nagapakita nga halos wala sang posibilidad nga may magluntad nga kontaminasyon sa mga produkto nga i-angkat gikan sa New Zealand.
Base sa datos sang Bureau of Animal Industry, ang Pilipinas naka-import na sang 1.06 bilyon ka kilo sang karne halin sang Enero tubtob Agosto, nga may pagtaas nga 16.5 porsyento kumparar sang kapareho nga periodiko sang nagligad nga tuig.
Sa amo man nga tion, ang New Zealand naka-export sa Pilipinas sang 8.57 milyon ka kilo sang karne, kun sa diin kadam-an amo ang karne sang baka, nga may market share nga mas manubo sa isa ka porsyento.
