Ginaduso sang Department of Agriculture ang pagpasangkad sang palm oil industry sa Pilipinas agud mabuhinan ang halos 90% nga pagsalig sang pungsod sa imported palm oil.
Suno kay DA Secretary Francisco Tiu Laurel Jr., daku ini nga oportunidad para sa mga mangunguma kag lokal nga mga negosyante bangud sang mataas nga demand sa merkado.
Naghingyo man ang DA sang P300 million nga pundo para sa 2027 palm oil development program, samtang target naman ang tubtob P1 billion nga tuigan nga alokasyon sa sulod sang lima ka tuig sa tion nga ma-enact ang Palm Oil Bill.
Katuyuan sang sini nga tikang agud nga mapauswag ang 300,000 ka ektarya sang palm oil plantations, lakip na ang 100,000 ka ektarya antes matapos ang 2028, kag mag-appoint sang separado nga deputy administrator kag team sa Philippine Coconut Authority agud magtutok sa industriya.
