Ginabantayan sang Department of Agriculture (DA) ang padayon nga pagsaka sang presyo sang sili sa nagkalain-lain nga merkado sa pungsod.
Suno sa report, nagapakita sang tumalagsahon nga pagtaas ang presyo sang sili nga nagatuga sang kabalaka sa mga konsumidor.
Sa ginpatigayon nga monitoring sang DA Bantay Presyo, nadeterminar nga naglab-ot na sa ₱900 kada kilo ang pinakamataas nga selling price sang sili sa mga merkado sa Metro Manila.
Daku ini nga saka kon ipaanggid sa presyo sang nagligad nga mga binulan.
Sang Agosto, ang presyo sang sili ₱500 lamang kada kilo, kag sang Hulyo, ginabaligya ini sa ₱350 kada kilo.
Gin-athag sang DA nga ang pagnubo sang produksyon sang sili masami nga nagakatabo sa tig-ululan. Ang masami nga pag-ulan nagaapektar sa pagtubo kag pagdamo sang mga sili.
Base sa report, nagaguwa nga nagnubo ang supply sang sili halin sa mayor sini nga ginakuhaan kaangay sang Ilocos Region, Central Luzon, kag Bicol Region.
Pahayag sang DA nga aktibo sila nga nagapangita sang iban pa nga sources sang supply sang sili agud masabat ang demand sang merkado.
