Hugot nga ginabantayan sang Department of Agriculture (DA) ang posible epekto sa agrikultura kag trade sector sang pungsod sang nagapadayon nga tensyon sa Middle East.
Ginpahayag sang Department of Agriculture, Ang malawig nga kinagamo sa rehiyon mahimo gilayon nga makaapekto sa agrikultura sang Pilipinas, ilabi na nga nagasalig ang pungsod sa pag-import sang pila ka mga importante nga produkto.
Suno kay Agriculture Secretary Francisco Tiu Laurel Jr., mahimo nga magtaas ang presyo sang langis sa pangkalibutanon nga merkado, nga magaresulta sa mas mataas nga gasto sa krudo, abono, kag kargamento.
Ginhatagan pagtamod sang DA nga kun padayon nga magtaas ang presyo sang krudo, magataas man ang gasto sa farm inputs para sa mga lokal nga mangunguma.
Pahayag pa ni Laurel, ginatun-an man sang gobyerno ang paghatag sang fuel subsidy sa mga sektor nga labi nga apektado sang oil price volatility, pareho sang transportasyon kag agrikultura.
Ginatan-aw man sang administrasyon ang isa ka proposal nga hatagan sang gahum ang Presidente nga temporaryo nga buhinan ang fuel excise taxes agud mapanubo ang presyo sang langis.
