Nagarekomendar ang Department of Agriculture (DA) nga ipatuman liwat ang 60 ka adlaw nga implementation sang P50 kada kilo nga price cap sa imported rice agud maproteheran ang mga konsumidor batok sa posible nga pagsaka liwat sang presyo sang bugas.
Suno kay Agriculture Secretary Francisco Tiu Laurel, ginsumiter na sang ahensya ang rekomendasyon nga ibalik ang price ceiling agud mapabilin nga estable ang retail price samtang limitado pa ang suplay sang bugas sa merkado.
Kon ma-aprubahan, ipatuman liwat ang polisiya nga nagtakda sang P50 kada kilo nga pinakamataas nga presyo para sa 5% broken imported rice, nga nagtapos sang Hunyo 13, 2026 matapos ang orihinal nga 30 ka adlaw nga implementasyon kag wala na ini ginpalawig sang gobyerno.
Matandaan nga sang Mayo 13, 2026, ginpirmahan ni President Ferdinand Marcos Jr. ang Executive Order No. 118 nga nagpatuman sang P50 kada kilo nga price cap sa imported rice sa bug-os nga pungsod agud mapunggan ang indi makatarungan nga pagsaka sang presyo, malikawan ang market abuse, kag masiguro nga may abot-kaya nga bugas para sa publiko sa tunga sang pagsaka sang presyo sang mga pagkaon bangud sang krisis sa Middle East.
