Naghatag sang libre nga abono ang Department of Agriculture sa 792 ka mangunguma sa Roxas City agud mabuligan ang ila nga panguma kag mahagan-hagan ang gasto sa pagtanum.
Sa interview sang Bombo Radyo kay Mary Ann Baria, City Agriculturist sang Roxas City, iya ginpahayag nga kabahin ini sang Masagana Rice Industry Development Program (MRIDP) nga ginapatuman sang lokal nga panguluhan.
Suno sa iya, per cluster ang pagpanagtag sang abono, nga nagalakip sang nagkalain-lain nga klase sang biofertilizer para sa dry season.
Samtang, 624.8 hectares nga duta ang makabenepisyo sa nasambit nga programa agud mabuligan ang pagtubo sang mga tanum sang mga mangunguma.
Dugang pa ni Baria, may database ang Department of Agriculture sang mga mangunguma sa siyudad, rason nga halos tanan nga kwalipikado nga farmers ang makabaton sang libre nga abono.
Gin-encourage man niya ang mga mangunguma nga gamiton sang husto ang mga abono nga ila nabaton, samtang padayon ang panikasog sang City Agriculture Office nga makahatag pa sang dugang nga bulig sa sektor sang agrikultura.
