Nagahimo na sang tikang ang Department of Agriculture Region 6 para ma-control ang paglapta sang African Swine Fever sa Region 6.
Sa interview sang Bombo Radyo kay Dr. Lerisa Balopeños , Chief sang Integrated Laboratories Division Department sang Department of Agriculture Western Visayas, iya ginpahayag nga nagapakig-angot na ang ila nga task force sa mga area nga apektado sang nasambit nga virus.
Suno kay Balopeños, endemic na ang ASF sa Pilipinas umpisa pa sang 2022.
Pahayag pa niya, dapat nga seryosohon ang liwat nga pagdamu sang kaso bangud mahimo ini nga makaapekto sa palangabuhian sang mga hog raisers kag manugbaligya sang karne sang baboy sa mga mercado.
Dugang pa niya, siguruhon nga magbakal lang sa lehitimo nga balaligyaan nga nag-agi sa mga slaughterhouse kag may yara sang nagakaigo nga dokumento agud nga ibaligya.
Nagpahanumdom man ang natungdan nga i-report kun may yara sang mga kaso sang pagkalamatay sang baboy sa lugar agud nga ma-tsekyar sang mas temprano kag malikawan ang paglapta pa gid sang virus.
