Nagpakigbahin ang Department of Agriculture-Western Visayas sang mga accomplishment sang ila talatapan subong nga tuig 2025.
Sa interview sang Bombo Radyo kay Mr. Dennis Arpia, Regional Executive Director sang Department of Agriculture – Western Visayas, iya ginpahayag nga nagapabilin nga mataas ang ila commitment sa mga mangunguma kag manugpangisda sa bug-os nga rehiyon.
Suno kay Arpia, mas ginpasangkad pa ang ila nga mga programa kaangay sang pagtudlo sang pagtanum sang inbred kag hybrid rice nga mas nagpataas sang kalidad sang bugas sa merkado.
Nagbukas man ang pila ka mga rice processing centers sa rehiyon agud makabulig sa mas madasig nga pagproseso sang humay sang mga mangunguma.
Mas ginapasangkad man ang paggamit sang mga makinarya kaangay sang drone seeding kag pag-spray sang pesticide sa mga ulumhan.
Pahayag pa niya, nagapadayon man ang pagpanghatag sang assistance sa mga mangunguma kag manugpangisda nga naapektuhan sang El Niño kag kalamidad nga nag-agi sa pungsod tubtob sa masunod nga tuig.
Nagpanawagan man ang natungdan sang kooperasyon agud nga mas mangin madasig pa ang pag-umwad sang sektor sang agrikultura.
