Ginpasalig sang Department of Budget and Management nga ang salary increases, retirement benefits, ukon pension sang military kag uniformed personnel ang indi ma-delay ukon maapektuhan sa idalum sang 2026 national budget.
Sa isa ka press briefing sa Malacañang, ginpahayag ni DBM Secretary Rolando Toledo nga indi matuod ang nagalapta nga alegasyon nga gindula ang pondo para sa personnel services sa idalum sang unprogrammed appropriations.
Ginklaro sini nga ang kantidad nga ginatumod ang para sa subsistence allowance increase sang mga military kag uniformed personnel nga ginsaylo lang halin sa miscellaneous personal benefit funds pakadto sa regular budget sang tagsa ka mga implementing agencies.
Dugang pa niya nga kabahin ini sang polisiya sang gobyerno ang pagbutang sang regular nga benepisyo direkta sa budget sang ahensya agud mangin madasig, maathag, kag mas matawhay ang pag-release kag paggamit sang pondo.
Ginhatagan man pagtamod ni Toledo nga nalakip sa 2026 budget sang ila tagsa ka ahensya ang pagsaka sa sweldo sang mga nagatrabaho subong nga gobyerno, sibilyan kag uniformed personnel kag wala pa ginkakas, ginpaisol, ukon ginbuhinan.
Nahibaluan nga subong nga tuig 2026, magasugod ang una nga tranche sang base pay adjustment sang mga militar kag uniformed personnel, suno sa Executive Order No. 107 nga nagabalor sang 21.7B, sa diin 15.4 bilyon ang iga-alokar para sa active service base pays adjustment kag 6.3 bilyon naman para sa mga pension obligations.
