Maga-ugyon ang Department of Education – Capiz sa palaabuton nga “The Next Bombo Idol” sa Disyembre 6, 2025 nga pagapatigayunon sa isa ka mall sa syudad sang Roxas.
Sa interview sang Bombo Radyo kay Dr. Roel Bermejo, Schools Division Superintendent , Schools Division of Capiz, iya ginpahayag nga ang collaboration kaupod ang Bombo Radyo Philipines ang daku gid ang mabulig sa mga estudyante agud mapakita ang ila nga abilidad.
Suno kay Dr. Bermejo, ang ini nga aktibidad ang magapasanyog sang kina-iya nga pontential sang kada kabataan sa patag sang extemporaneous speaking kun sa diin matagaan sila sang kahigayunan nga mapagwa ang ila nga mga sentimyento nahanungod sa nagkalain-lain nga topiko.
Pahayag pa niya, ang paggamit sang hiligaynon bilang medium of instruction ang magapakita sang pagpalangga sa kaugalingon nga diyalekto.
Samtang, magluwas sa “The Next Bombo Idol”, magapatigayon man ang ila talatapan sang awarding ceremony sa mga outstanding partners and stakeholders lakip na ang Bombo Radyo Roxas nga nangin kabahin sang pagdul-ong sang impormasyon sa mga estudyante.
Dugang pa sang natungdan, magapadayon ang ila pagserbisyo ilabi na sa pag implementar sang inclusive education para sa tanan nga estudyante bisan ano pa ang kasablagan sa lawas, ang maka-angkon sang patas kag husto nga edukasyon.
Interviewed by: Bombo Chris Jan Lozada via Zona Libre
