Ginpasiguro sang Department of Energy (DOE) nga bastante ang supply sang produktong petrolyo sa Pilipinas sa pihak sang nagalala nga tensyon sa Middle East, partikular sa tunga sang Israel kag Iran nga gin-intrahan pa sang military involvement sang Estados Unidos.
Sa interview sang Bombo Radyo Roxas kay Energy Secretary Sharon Garin, ginpahayag sang tiglikom nga may stockpile ang mga kumpanya sang langis nga bastante para sa masunod nga 30 ka adlaw.
Magluwas pa diri, ginpasiguro man sini nga may buffer stock ang gobyerno nga mahimo nga magdugay sang 15 ka adlaw sa tion nga mag-angkon sang pagka-delay sa global supply chain.
Gin-ako ni Garin nga indi sa gihapon madula ang pagkahangawa sa posibilidad sang gulpi nga pagtaas sang presyo sang gatong tuga sang nagalala nga geopolitical conflict.
Dugang pa sang natungdan, apisar indi pa apektado subong ang lokal nga supply, posible nga mag-angkon sang domino effect sa pangkalibutanon nga presyo kun indi gilayon makaayo ang tensyon.
Pahayag pa sang tiglikom, padayon ang pakig-angot sang DOE sa mga oil industry stakeholders agud masiguro ang stability sang supply kag malikawan ang panic buying sang mga bumalakal.
Panugyan sang ahensya sa publiko, mangin kalmado kag likawan ang pagbakal sang sobra-sobra nga gatong bangud bastante ang imbentaryo sang pungsod.
Kaangut sini, ginatun-an suno diri sang DOE ang posible nga mga tikang agud mabuhinan ang epekto sang anuman nga oil price hike, kalakip na ang pagpatuman sang mga subsidy ukon fuel discount program para sa mga sektor nga direkta nga maaapektuhan kasubong sang transportasyon kag agrikultura.
