Nagalaum ang Department of Energy (DOE) nga magapadayon ang pagnubo sang presyo sang langis kasunod sang peace deal sa tunga sang Amerika kag Iran nga opisyal nga pagapirmahan subong nga semana.
Suno kay Energy Secretary Sharon Garin, nagalaum sila nga sa katapusan maselyohan na ang kasugtanan sa Biyernes.
Ginreport man ni Energy USec. Sandy Sales nga ang presyo sang langis nagnubo sa P80 kada litro nga lebel gikan sa masobra P120 kada litro matapos nga nag-igo ang krisis sa Middle East.
Suno sa iya, ang bag-o lang nga rollback sa presyo sang langis nagapakita sang paglaum sang pangkalibutanon nga merkado sa resulta sang peace deal sa tunga sang US kag Iran.
Nagpabutyag man sang paglaum ang opisyal sang DOE nga maganubo pa gid ang presyo, apang suno sa iya mahimo nga maglawig ini sang anum ka bulan tubtub isa ka tuig bangud sang kahalitan nga ginbilin sang inaway sa nagkalain-lain nga oil storage kag production facilities sa Middle East.
