Ginkumpirma sang Department of Foreign Affairs nga isa ka 53-anyos nga Filipino tourist ang napatay samtang nagasakay sa “Frozen Ever After” nga atraksyon sa Hong Kong Disneyland.
Suno sa ahensya, nadulaan sang animo ang biktima kag natumba samtang yara sa sulod sang nasambit nga ride.
Ginkumpirma man sang Philippine Consulate General sa Hong Kong ang insidente matapos nga nagpakig-angot sa Lantau Police Headquarters.
Pahayag sang Department of Foreign Affairs, gilayon nila nga ginpakig-angutan ang pamilya sang napatay agud magpalab-ot sang pagpakig-unong kag magbulig sa pagproseso sang repatriation sang bangkay.
Bilang sabat, temporaryo nga ginpasirado sang Disneyland ang Frozen Ever After ride umpisa kahapon kag magalawig tubtob Setyembre 19 bangud sa ginaalegar “operational adjustment”.
