Ginmando ni Department of Migrant Workers (DMW) Secretary Hans Leo Cacdac ang paghatag sang komprehensibo nga reintegration assistance kay Mary Jane Veloso matapos nga ginhatagan sang absolute pardon kag ginbuy-an sa detention.
Suno sa DMW, isa ka support team ang gintukod nga magapakig-angot sa pamilya ni Veloso sa Nueva Ecija agud magpatuman sang mga programa nga makabulig sa iya sa pagsugod liwat kag pagpadayon sang iya malawig nga palangabuhian.
Lakip sa mga tikang amo ang paghatag sang family and community-level interventions para sa kaayuhan ni Veloso, sang iya mga kabataan kag ginikanan.
Ang DMW magatrabaho man upod sa Overseas Workers Welfare Administration (OWWA) agud masiguro ang padayon nga suporta kag i-angot ang posible nga palangabuhian sang Veloso sa mga kooperatiba kag mga oportunidad sa ekonomiya sa Nueva Ecija.
Matapos ang 16 ka tuig nga pagkapreso, nagbalik sa iya probinsya sang Nueva Ecija si Mary Jane Veloso.
