Ginmanduan sang Department of the Interior and Local Government (DILG) ang mga local chief executives (LCEs) nga hugot nga dumilian ang pagsulod sang sin-o man sa sulod sang apat ka kilometro nga “permanent danger zone” sa palibot sang Bulkan Bulusan sa Sorsogon, kasunod sang phreatic eruption nga nagluntad sang Abril 28.
Base sa rekomendasyon sang Philippine Institute of Volcanology and Seismology (Phivolcs), nagpanugyan man ang DILG sa mga lokal nga panguluhan nga maghalong sa expanded danger zone sang bulkan, bangud sa pamahog sang pyroclastic density currents, ballistic projectiles, rockfall, landslides kag rain.
Sa isa ka advisory, ginhingyo sang DILG ang mga LCEs nga ipatuman ang “Operation L!sto” protocols para sa paglupok sang bulkan kag magkoordinar sa ila tagsa ka Regional Disaster Risk Reduction and Management Councils (RDRRMCs).
Ginpanugyanan man ang mga komunidad nga magsuksok sang face mask ukon basa nga tela agud malikawan ang paghaklo sang abo, kag mangin alerto ilabi na sa mga manubo nga lugar kag river channels nga posible mabahaan sang lahar sa tion sang mabaskog nga ulan.
Ginpahibalo man ang mga aviation authorities nga dapat likawan sang mga piloto ang paglupad malapit sa putukputukan sang bulkan.
Suno sa report, ginabulubanta nga masobra 29,000 ka mga tawo sa 25 ka mga barangay sa Sorsogon ang apektado sang paglupok, samtang 1,132 ka mga pamilya gikan sa mga barangay sang Buraburan, Guruyan, Calmayon, Catanusan, kag Puting Sapa ang may limitado nga access sa matinlo nga tubig nga mainom.
Samtang, naglab-ot na sa P675,000 ang ginreport nga kahalitan sa agrikultura sa banwa sang Juban nga nag-apekto sa 45 ka mga mangunguma.
Nagapabilin sa gihapon ang alert level 1 (low-level unrest) sang Bulkan Bulusan.
