Wala sang may natumod nga ghost flood control projects sa Western Visayas sandig sa ginpatigayon nga field monitoring sang Department of Economy, Planning, and Development Region 6 (DEPDev-6).
Suno kay DEPDev-6 Regional Director Arecio Casing Jr., may yara sang narekord nga anomaliya sa mga flood control project sa rehioyon, apang indi ini pareho kalala sa iban nga bahin sang pungsod.
Ginpahayag ni Casing nga wala naglab-os sa lebel sang ghost projects ang ila mga natumod sa rehiyon.
Sandig sa monitoring sang DEPDev-6, naga-eksister sa aktwal nga lokasyon ang mga proyekto nga nakalista sa mga dokumento nga napasa sang Department of Public Works and Highways (DPWH).
Ginpahayag ni Casing nga kinahanglan sa gihapon nga i-verify ang ano man nga proyekto nga indi makit-an sa aktwal nga lokasyon.
Paathag niya, nakapasa na sang mga reports ang monitoring agencies sa Office of the President, kag ginpasa sa mga ahensya nga mahimo maggamit sang amo nga reports bilang basehan sang ila assessment kaangay sang ang Department of Justice (DOJ), National Bureau of Investigation (NBI) kag Philippine National Police (PNP).
Suno kay Casing, ang mangin resulta sang mga imbestigasyon, lakip na ang mga kaso nga ginpasaka ukon mahimo pa nga ipasaka sang Office of the Ombudsman, ang magahatag sang mas maathag nga sabat sa kalapadon sang mga nakit-an nga anomaliya.
Ginpahayag niya nga kaupod ang DEPDev-6 kag Regional Project Monitoring Council sa mga ginmanduan nga mag-usisa sa flood control projects sa bilog nga pungsod, sa bulig sang Department of Budget and Management (DBM), Department of the Interior and Local Government (DILG) kag iban pa nga ahensya.
Lakip sa nagapanguna nga pag-usisa amo ang aktuwal nga existence sang isa ka proyekto sa lugar nga nasulat sa mga dokumento.
Kun napamatud-an nga naga-eksister ang proyekto, indi na sakop pa sang DEPDev-6 ang pagberipika kun ini ang substandard ukon overpriced.
Kinahanglan nga itugyan sa mga nagakaigo nga government agency ang pag-usisa sa kalidad sang konstruksyon kag kun insakto man ang balor sang proyekto.
Sandig sa records sang DPWH-6 para sa fiscal years 2023 tubtob 2025, may 462 flood control projects sa Western Visayas, sa diin 264 ang natapos.
Sang Pebrero, ginmandu naman sang Department of Environment and Natural Resources (DENR) Region 6 ang quality assessment sa mga natapos na nga flood control structure matapos makumpirma sa verification nga wala sang ghost project sa rehiyon.
