Ginaduso sang Department of Economy, Planning, and Development (DepDev) ang paggamit sang variable tariffs bilang isa ka posible nga solusyon agud maproteksyunan ang mga mangunguma sa nagabag-o-bag-o nga presyo sang humay kag masiguro ang barato nga bugas para sa mga konsumidor.
Suno kay DepDev Secretary Arnesio Balisacan, kinahanglan ang malawig nga solusyon nga indi mangin palas-anon sa ekonomiya kag makabulig sa pag-establisar sang mga presyo para sa mga mangunguma.
Nagatumod ini sa pagbalik sang Most Favored Nation (MFN) tariff rate sa 35% nga mahimo magpataas sang presyo sang bugas kag makatuga sang inflation.
Madumduman nga sang Hulyo 2024, ginpanubo sang gobyerno ang MFN tariff sa bugas halin sa 35% pakadto sa 15% agud mapanubo ang presyo.
Apang suno kay anay kongresista nga si Joey Salceda, mas nakabenepisyo diri ang mga importers kag mga negosyante, kag indi ang mga konsumidor ukon mga mangunguma.
Samtang ginpasalig ni Balisacan nga ang 60-day suspension of rice importation nga ginapatuman umpisa Setyembre 1 ang indi makaapekto sa inflation, bangud bastante na ang buffer stock sang pungsod sa sulod sang 40 ka adlaw kag maayo nga patubas sang humay ang ginalauman subong nga season.
Una diri, ginmando ni Presidente Ferdinand Marcos Jr ang pagsuspinde sang rice imports agud maprotektahan ang mga lokal nga mangunguma nga naganubo ang ila kita bangud sa manubo nga presyo sang bugas, nga nagnubo halin sa P24.93 kada kilo sang 2024 tubtob sa P16.99 sang Hulyo 2025.
