ROXAS CITY – Padayon ang ginahiwat nga preparasyon sang DepEd Capiz Division para sa pagbukas sang klase ukon limited face-to-face classes nga magasugod na sa bulan sang Agosto.
Ini ang ginkumpirmar ni Dr. Miguel Mac Aposin, DepEd Capiz Division Superintendent sang napakig-angutan sang Bombo Radyo.
Suno diri, may ara sa gihapon sang pagapreparahan kasubong sang mga pagpanghangkat sa mga manunudlo natuhoy sa compliance sa pagpatuman sang minimum health protocols para sa mga estudyante.
Ginpahayag ni Dr. Aposin, nga nagpatawag siya sang pagsinapol kaupod ang school heads sa probinsya kag diri sila naghinun-anon nahanugod sa pagpreparar sa pagbukas klase, nagpalab-ot man ang mga ini sang ila kinahanglanon sa tagsa ka bulutho-an kasubong sang pagpahamtang sang hand-washing area, pagpakay-o sang classrooms, kag dugang nga mga manunudlo.
Magapahamtang man ang tagsa ka bulutho-an sang reminders ukon signage nga magapahanumdom sa mga estudyante agud malikawan ang nagkalain-lain nga balatian partikular ang Covid-19.
Dugang ni Dr. Aposin, ginpatawag siya ni Governor Fredenil Castro agud man mahibaluan sini ang ila aksyon kag preparasyon kag nagpasalig man ang gobernador sa iya nga hatagan sini sang prayoridad ang edukasyon kun sa diin magabulig ini sa paghatag sang ila kinahanglanon.
