ROXAS CITY– Naalarma ang Department of Education Capiz Schools Division kasunod sang pagka-aresto sa isa ka public school teacher sa drug buy bust operation sa Barangay Tanza Sur, Panay, Capiz.
Sa interview sang Bombo Radyo kay Capiz Schools Division Superintendent Dr. Miguel Mac Aposin, ginpahayag sini nga pabor siya nga mahatagan sang leksiyon ang manunudlo nga Ronald Burata nga nagatudlo sa Buntod Elementary School sa nasambit nga banwa apang dapat mag-agi sa ensakto nga proseso.
Suno kay Aposin nga wala ginatolerar sang DepEd ang kasubong iligal nga hilikuton labi na nga apektado diri ang puturo sang mga estudyante.
Magapangatubang man si Burata sang kaso administratibo kag posible nga masipa sa pwesto kun mapamatud-an nga nagagamit kag nagabaligya ini sang droga.
Samtang aminado si Dr. Aposin nga ginkakibot sini ang report nga ginahatagan ni Burata sang droga ang mga high school students kabaylo sang paggamit sini sa mga ini.
Ginahulat na lamang sang DepEd Capiz Division ang imbestigasyon sang pulisya sa diin ini ang ila mangin balasehan sa pila ka mga tikang nga himoon.
Nahibaluan nga madamo sa mga kaupdanan nga manunudlo ni Burata ang nakibot sang mahibaluan nga isa ini ka drug personality kag posible ginagamit sini ang pagtudlo para makahimo sang iligal nga buluhaton.
