ROXAS CITY – Gin-athag sang pamunuan sang Department of Education (DepEd) Capiz Schools Division nga wala pa sang suspensiyon sang anuman nga aktibidad sa probinsiya bangud sang coronavirus disease (COVID-19) outbreak.
Ini ang ginpahayag ni DepEd-Capiz Schools Division Superindent Dr. Salvador Ochavo Jr. sang mainterview sang Bombo Radyo.
Suno kay Ochavo, wala pa sang nabaton nga mandu gikan sa DepEd Regional Office natuhoy sa pagsuspinde sang pila ka mga aktibidad sang mga eskwelahan.
Wala man suno diri sang mandatu nga ipaiway ang nagahilapit nga Western Visayas Regional Athletic Association (WVRAA) Meet 2020 nga natalana nga patigayunon sa probinsiya sang Aklan.
Apang suno kay Ochavo nga wala sini ginapahanugutan ang pagpatigayon sang fieldtrips sa mga eskwelahan bangud dako ini nga risgo sa seguridad sang mga estudyante.
Matandaan nga ginsuspinde sang DepEd ang tanan nga naka-schedule nga national kag regional events kapareho sang Palaro Regional Meets bangud sang pamahog sang COVID-19 sa pungsod.
Mahibaluan nga ‘until further notice’ ang suspensiyon sang mga aktibidad.
