Gina-agda sang Department of Education- Capiz ang publiko sa pagtambong sa Brigada Eskwela 2026.
Sa interview sang Bombo Radyo kay Yzarda Claudette Ballera, Division Information Officer sang Department of Education- Capiz, iya ginpahayag nga ang Brigada Eskwela ang isa ka tuigan nga lihok nga ginapatigayon para i-preparar ang mga eskwelahan para sa pagbukas sang klase.
Suno kay Ballera, subong nga tuig, magasugod ang Brigada Eskwela sa June 1 tubtob 5 sa bug-os nga Pilipinas.
Pahayag pa niya, ginahingyo gid ang collaborative effort sang mga ginikanan, estudyante kag iban pa nga miyembro sang komunidad sa pagbulig agud mangin madinalag-on ang nasambit nga aktibidad.
Nahibaluan nga ang Department of Education- Capiz man ang maga-host sang Regional Brigada Kick-off sa palaabuton nga June 3, 2026.
Nagalaum man ang natungdan, nga mangin matalunsay kag mapuno sang pagbayanihan ang Brigada Eskwela sa subong nga tuig.
