Ginsiguro sang Department of Education-Capiz ang kahandaan sang mga buluthuan sa probinsya sa posible implementasyon Strengthened Senior High School Curriculum.
Sa interview sang Bombo Radyo Roxas, Dr. Roel Bermejo, ang Schools Division Superintendent sang Capiz, iya ginpahayag ang tanan nga programa nga gina-implementar sang Deped kag iban pa nga ahensya, nagaka-eksperyensyar sang transition challenges.
Suno kay Bermejo, ang mga buluthuan ang ginapaidalum sa readiness assessment antes aprubahan nga mag-offer sang bag-o nga programa bangud ginalantaw ang manpower compliment, mga pasilidad kag iban pa nga kinahanglanon.
Pahayag pa niya, padayon man ang ginapatigayon nga training sang mga manunudlo para sa core subjects para sa Grade 11 kag pagasundan naman sang content based training sa mga masunod pa.
Nahibaluan nga tinutuyo sang Strengthened SHS Curriculum amo ang makahatag sang mas dekalidad, flexible, kag mas epektibo nga edukasyon agud mangin handa ang mga estudyante sa kolehiyo, trabaho, kag iban pa nga oportunidad pagkatapos sang Senior High School.
