ROXAS CITY, CAPIZ – Nagapanawagan ang Department of Education (DepEd) Capiz sa komunidad nga magbulig sa Brigada Eskwela 2025 bilang preparasyon sa pagbukas sang klase sa Hunyo 16, 2025.
Sa interview sang Bombo Radyo kay Schools Division Superintendent Dr. Roel Bermejo, iya ginaimbitar ang publiko nga maghiwat sang bayanihan para sa kaayuhan sang mga kabataan. Ginapanawagan man sini ang hamili nga bulig sang tagsa ka sektor agud mangin malimpyo kag handa ang mga eskwelahan sa pagsugod sang klase.
Suno kay Bermejo may simultaneous kick-off program subong nga adlaw sa tanan nga 471 ka eskwelahan sa probinsya sang Capiz. Matapos sini, isa ka Oplan Balik Eskwela convergence ang pagahiwaton kaupod ang nagkalain-lain nga government agencies.
Ang kick-off activity sang Brigada Eskwela subong nga adlaw ginsuguran pinaagi sa Brigada Caravan padulong sa Dao National High School kag Dao Central School. May tree planting activity man nga pagapatigayonon bilang kabahin sang programa.
Nahibaluan nga ang tema subong nga tuig amo ang:
“Brigada Eskwela: Sama-sama Para sa Bayang Bumabasa.”
Pahayag pa sang natungdan nga ginalauman ang pagbuylog sang mga LGU officials, kapulisan, stakeholders, media, mga ahensya sang gobyerno, bank institutions, organisasyon kag iban pa.
