ROXAS CITY – Nagapatigayon sang school intervention program ang mga eskwelahan sa Capiz, kadungan sang pagpanumbalik sang face to face classes.
Ini ang ginkumpirmar ni Dr. Miguel Mac Aposin, Capiz Schools Division Superintendent, sang mainterview sang Bombo Radyo.
Aminado ang talatapan sang Capiz Division nga dako ang nangin kapiyerdehan sa pagtulon-an, sa duha ka tuig nga wala sang face to face classes.
Natukiban man nga may mga learner ilabi na sa Grade-III nga indi pa makahibalo magbasa, magsulat kag mag-isip, gani antes magpadulong sa masunod nga grado, kinahanglan nga matutukan ang mga ini.
Bilang intervention, gin-identify sang mga manunudlo ang mga estudyante nga nagakinahanglan sang remedyo.
Dako man ang pagpasalamat ni Aposin sa pagpatuman sang face to face classes bangud maamat-amat sabat ang mga learning losses pinaagi sa intervention program sang Capiz Division.
