Nagpatigayon sang nagkalain-lain nga inisyatibo ang Department of Education (DepEd) Capiz agud mapabaskog kag mas hugot ang seguridad kag safety sang mga manunudlo kag estudyante sa 471 ka mga eskwelahan sa probinsya.
Sa interview sang Bombo Radyo kay Glenda Marie Botin, Division Disaster Risk Reduction and Management Officer sang DepEd Capiz, iya ginpahayag nga ginapatuman sa mga eskwelahan ang School Intervention Plan bilang kabahin sang ila safety measures.
Sa sini nga plano, ginadesisyonan sang tagsa ka eskwelahan ang mga aktibidad kag tikang nga himuon kun may nagkalain-lain nga risgo nga matabo sa sulod sang eskwelahan.
Lakip man sa ginapatuman ang random kag regular nga bag inspection agud masiguro nga wala sang ginadumilian nga mga gamit nga makasulod sa eskwelahan lakip na ang pag-inspect sang bag sa gate kag surprise inspection sa mga classroom.
Gintukod man sang DepEd Capiz ang School Safety and Security Teams sa diin indi lamang mga security guard ang nagabantay sang seguridad, kundi may yara man sang mga miyembro sang school personnel nga kabahin sang team.
Nagpatigayon man ang DepEd Capiz sang mga orientation agud mahibaluan sang mga miyembro sang team kun ano ang dapat kag indi dapat himuon sa tion sang emerhensya.
Dugang sang natungdan, ini nga mga tikang kabahin sang padayon nga pagsiguro sang safety kag security measures sang mga eskwelahan sa Capiz agud maprotektahan ang mga estudyante kag mga manunudlo.
