ROXAS CITY – Nagtukod na sang Dengue Task Force sa tagsa ka eskwelahan sa probinsiya sang Capiz sa idalum sang Department of Education Capiz Division.
Pirmado ni Dr. Roel Bermejo, schools division superintendent ang memorandum no. 115 series of 2019 nga ginpaguwa kasunod sa pagdeklara ni Governor Esteban Evan Nonoy Contreras sang dengue outbreak sa probinsiya sang Capiz.
Ginpahayag ni Dr. Roel Bermejo nga tuyo sini nga memorandum nga maproteksyunan ang mga kabataan kag mapauntat ang pagtaas sang numero sang dengue sa probinsiya.
Nasaad man sa memorandum ang request sa mga ginikanan nga mahimo indi na pagpasuksukon sang uniporme ang mga estudyante sa baylo mahimo sila magsuksok sang bayo nga may mahaba nga manggas ukon pantalon agud malikawan nga makagat sila sang lamok nga posible nagadala sang balatian nga dengue.
Nagpanugyan man sila sa mga eskwelahan nga magbakal sang mga mosquito repellants nga ipanagtag sa mga estudyante agud mapunggan ang posible nga pagkagat sa ila sang lamok.
Ginpalab-ot man sang opisyal sa mga ginikanan nga padayunon ang pagpatuman sang 4’oclock habit kag ang 4S strategy nga isa man ka epektibo nga pamaagi agud mauntat ang mga lamok nga nagadala sang dengue.
