ROXAS CITY, CAPIZ- Padayon ang ginpatigayon nga pag-validate kag inspeksyon sang Department of Education-Capiz, sa tagsa ka mga eskwelahan nga nakarekord sang minor damages matapos ang nabatyagan nga Intensity IV nga linog sa probinsya.
Sa interview sang Bombo Radyo kay Dr. Roel Bermejo, Schools Division Superintendent sang Department of Education Capiz, iya ginpahayag nga padayon sa karon ang on-ground kag actual validation sang DepEd Engineers kaupod ang pila pa ka mga ahensya sa tagsa ka mga hulut-klasehan nga nag-angkon sang litik sa salog kag dingding.
Suno kay Bermejo, sa inisyal nga datos nga nakuha sang ila nga talatapan as of October 3, 2025, yara sa 448 ka mga classrooms ang nag-angkon sang mga damages sa diin naghalin ini sa 98 ka mga eskwelahan sa probinsya sang Capiz.
Pahayag pa nya, may posibilidad nga madugangan pa ang amo nga numero nga narekord sa subong.
Dugang pa sang natungdan, nagapadayon man ang ginadihon nga mga tikang sang ila nga talatapan agud masiguro nga luwas sa katalagman ang lunsay mga manunudlo kag mga estudyante.
Nagpasalig naman ini sa tagsa-tagsa nga ang ila talatapan, siguruhon gid nga mabantayan sang hugot ang ila nga nasakupan agud malikawan ang kun ano man nga sahi sang aksidente ang posible nga magluntad sa sulod sang tagsa ka mga eskwelahan.
Interviewed by Bombo Sunnie Mae Constantino Batencila
