ROXAS CITY — Nakahanda ang mga personnel sang Department of Education – Capiz Division pananglitan ipatuman na ang drug test sa mga eskwelahan.
Mahibaluan nga base sa pahayag ni DepEd Sec. Leonor Briones, ipaidalum sa mandatory drug testing ang tanan nga mga empleyado sang DepEd samtang ipatuman man ang random drug test sa mga bumulutho sa high school ukon sekondarya.
Suno kay DepEd Capiz Division Superintendent Dr. Miguel “Mac” Aposin, may pila ka mga opisyal sang dibisyon nga nagpaidalum na sa paghanas bangud sila ang magapanguna sa pagpatuman sang drug test sa palaabuton.
Ang nasambit nga drug test ang bilang pag-upod man sang ahensiya sa kampanya sang gobyerno batuk sa iligal nga droga.
Sa pihak nga bahin, nakadepende naman suno kay Aposin sa mga buluthuan kun malakip sa ila mga programa para sa Brigada Eskwela subong nga tuig ang pagkampanya batuk sa iligal nga droga sa mga eskwelahan.
Apang ginapasalig niya nga ginalakip naman sang DepEd sa ila pagpanudlo sa mga kabataan sa bilog nga tuig ang nagakaigo nga edukasyon agud mapahilayo sila sa iligal nga droga.
