ROXAS CITY – Gin-athag sang pamunuan sang Department of Education (DepEd) Capiz Schools Division nga wala sang dapat nga gastuson ang mga manunudlo kag bayaran ang mga estudyante para sa module sa nagahilapit nga pagbukas sang klase sa Agosto 24, 2020.
Ini ang ginpahayag ni DepEd-Capiz Schools Division Superindent Dr. Salvador Ochavo Jr. sang mainterview sang Bombo Radyo.
Suno kay Ochavo nga indi na kinahanglan sang mga manunudlo nga maggastos bangud may yara sang ginpain ang DepEd nga pondo para sa nasambit nga mga module para sa school year 2020-2021.
Nahibaluan nga ang una nga tatlo ka semana sang paghatag sang module ang pagakuhaon sa Maintenance and Other Operating Expenses (MOOE) sang mga buluthuan sa pagpanguna sang ila nga principal.
Magluwas diri, ginpahayag ni Ochavo nga maya yara sang pondo nga P68 million ang Central Office agud maka-produce sang module para sa mga estudyante nga kinahanglanon sa ila pagtuon sa sulod sang 1st quarter.
Nagapanawagan naman si Ochavo sa mga buluthuan diri sa probinsya nga gilayon i-report sa ila talatapan kun may yara sang mga manunudlo nga nagapanukot ukon nagagastos sang module para sa ila mga estudyante.
