Isa pa ka mataas nga opisyal sang Department of Education (DepEd) ang nag-ako nga nakabaton man siya sang mga envelope nga may unod nga kwarta sa tion sang tiglikom si Vice President Sara Duterte sang ahensiya.
Gin-ako ini ni DepEd Chief Accountant Rhunna Catalan sa ika-apat nga hearing sang House Committee on Good Government and Public Accountability angut sa kwestyunable nga paggamit sang confidential funds sang talatapan ni Vice President Sara Duterte.
Suno kay Catalan, ang nasambit nga mga envelopes nga naga-unod sang ₱25,000 ang gindaho sa iya ni DepEd Assistant Secretary Sunshine Charry Fajarda nga ginapatihan aide ni VP Duterte.
Pahayag ni Catalan, nagdugay sang siyam ka bulan ang pagbaton niya sang nasambit nga allowance sumugod February tubtob September 2023.
Gin-istorya man ni Catalan nga ginpapirmahan sa iya ni Fajarda ang mga liquidation vouchers para sa ₱112.5 million nga confidential and intelligence funds (CIF) nga winithdraw naman sang mister ni Fajarda nga si Edward nga amo ang special disbursing officer ni VP Sara sa DepEd.
