MANILA, Philippines – Ginpresentar sang Department of Education “DepEd”, ang campus security guard kag mobile patrol strategy sa bug-os nga public schools sa pungsod Pilipinas.
Suno kay Education Secretary Sonny Angara, yara sa hybrid campus security model ang estratehiya sang DepEd nga magabase sa kadakuon kag kinahanglanon sang tagsa ka campus, ilabi na bangud sa kakulangan sang security guards sa mga pampubliko nga eskwelahan.
Kabahin ini sang partnership sang DepEd, Local Government Unit “LGU”, Philippine National Police “PNP”, sa idalom sang Department of the Interior and Local Government “DILG”, Memorandum Circular No. 2026-037 ukon Safer School Zones.
Sa proposed security model, ang mga campus nga may mas manubo sa 500 kag 1,000 ka estudyante pagahatagan sang isa ka security guard nga mabuligan sang barangay tanod kag Parent-Teacher Association “PTA” volunteers.
Samtang, ang mga daku nga campus nga may tubtob 3,300 ka estudiyante pagahamtangan sang duha ka security guards, nga mahimo mabuligan sang barangay tanod kag PTA volunteers.
Para naman sa mga campus nga may sobra sa 8,000 ka learners, ginapanukala ang pagtalana sang apat ka security guards, upod ang mobile patrol sang PNP kag local security officers.
Samtang ang barangay tanod mangin nahauna sa linya bilang depensa sa perimeter sang eskwelahan, PTA assistance teams magabulig sa crowd kag traffic control.
Dugang man sa ginapatuman sang DepEd nga ang tikang ini ginhimo bangud sa nagasaka nga concerns sa seguridad sa mga eskwelahan, ilabi na matapos ang shooting incident sa isa ka private school sa Zamboanga.
Sa karon, duha ka phases ang igapatuman sang security strategy, nga magauna ang mga eskwelahan nga may daku nga populasyon sang estudyante antes ini ipatuman sa mga small kag medium schools.
