Nagpaguwa sang opisyal nga pahayag ang Department of Education (DepEd) may kaangtanan sa kamatayon sang isa ka Grade 4 learner sang Hugo Perez Elementary School-Annex sa Trece Martires City, Cavite.
Suno sa DepEd, sang Hulyo 2 nagpatigayon ang eskwelahan sang regular nga deworming activity sa bulig sang City Health Office.
Pagkatapos sang aktibidad, may pila ka mga estudyante ang nakabatyag sang indi maayo.
Sang Hulyo 3, naospital ang Grade 4 learner bangud sang pagsuka kag sang ulihi nagtaliwan.
Base sa inisyal nga medical findings, ang ginapatihan nga kabangdanan sang kamatayon amo ang infection nga nagresulta sa septic shock.
Ginpahayag sang DepEd nga nagahatag sila sang emotional, psyvhological kag iban pa nga bulig sa pamilya sang bata.
Nagapadayon man ang imbestigasyon sang mga health authorities agud mahibaluan ang bug-os nga natabo, samtang ginarepaso man sang departamento ang ila mga health kag safety protocols.
Nagpanawagan man ang DepEd sa publiko nga magsalig lamang sa beripikado nga impormasyon samtang nagapadayon ang imbestigasyon.
