MANILA, Philippines – Ginpirmahan sang Department of Education “DepEd”, kag Department of the Interior and Local Government “DILG”, ang Implementing Rules and Regulations “IRR”, sang Republic Act No. 12199 ukon ang Early Childhood Care and Development “ECCD”, System Act.
Sa ginpatigayon nga pagpirma sang IRR sa isa ka seremonya sa Quezon City nga ginpangunahan nanday DILG Secretary Jonvic Remulla, DepEd Secretary Edgardo “Sonny” Angara kag ECCD Council Executive Director Teresita Inciong.
Nahibaluan nga ginlagdaan ni President Ferdinand Marcos Jr., ang Republic Act No. 12199 sang Mayo 2025 agud mahatagan sang prayoridad ang early childhood education, nga may husto nga nutrition kag pag-atipan sa kabataan nga nagaedad sang zero tubtob lima ka tuig.
Dugang pa sa impormasyon sa idalom sang layi, ang ECCD Council nga attached agency sang DILG ang may responsibilidad sa pag-atipan sang kabataan nga wala pa nagalab-ot sa lima ka tuig ang edad, samtang ang DepEd ang nagadumala sa edukasyon sang kabataan nga nagaedad sang lima tubtob walo ka tuig.
Sa karon ang DILG kag DepEd ang nagaserbe bilang ex-officio co-chairpersons sang ECCD Council sa pagpatuman sang programa para sa kaayuhan kag husto nga pag-uswag sang mga kabataan.
