DEPED, magapagtukod sang tatlo ka bag-o ka mga classroom sa Dumarao, Capiz

Pormal na nga ginpirmahan ni Dumarao, Capiz Mayor Atty. Matteo Hachuela kag Kevin Vincent “Boboy” Hachuela ang Memorandum of Agreement ukon MOA kaupod ang Department of Education ukon DepEd.

Ang MOA may kaangtanan sa paghatag sang DepEd sang pondo para sa construction sang classrooms sa mga buluthuan sang banwa

Sa interview sang Bombo Radyo kay Hachuela, iya ginpahayag nga tatlo ka classroom ang pagatukuron para sa tatlo ka elementary schools sa amo nga banwa.

Suno pa sa alkade, kon maatipan sang maayo ang mga classroom, posible nga madugangan pa ini sa palaabuton.

Nagalaum naman ang natungdan nga makabulig ang proyekto sa paghatag sang mas maayo kag mas komportable nga lugar para sa pagtuon sang mga estudyante sang banwa.