Magasugod sa Agosto 25 ang Department of Education (DepEd) sang pagpatigayon sang active-threat drills sa mga eskwelahan sa bug-os nga pungsod bilang preparasyon sa posible nga mga insidente sang violence ukon peligro nga ginahimo sang tawo.
Pinaagi sa drill, pagatutokan kon paano mapadasig nga makaresponde, kag makapalikaw sa mga estudyante sa ila mga pamilya kon may matabo nga “human-induced threat.”
Gamiton man sa paghanas ang mga leksyon nga nakuha halin sa mga bag-o nga insidente sang pagpangluthang sa mga eskwelahan sa Tacloban kag Zamboanga City.
Suno kay DepEd Undersecretary Malcolm Garma, nahuman na sang departamento ang mga protocol nga ipatuman sa drill sa pakig-angut sa Philippine National Police (PNP).
Ginpaagi anay ini sa initial testing sa Manila Science High School.
Importante nga bahin sang drill ang “reunification stage,” diin ang mga estudyante, ginikanan, medical responders kag mga pulis magakadto sa mga ginadesignar nga lugar. Ini agud malikawan ang kagamo kag indi magtipon-tipon ang mga tawo sa palibot sang eskwelahan.
Ang amo nga protocol resulta sang assessment sang DepEd sa insidente sang school shooting sa Tacloban.
Suno kay Garma, kinahanglan palig-onon ang pagpanghanda, kahandaan kag awareness agud makaresponde gilayon ang mga eskwelahan kon may matabo nga violence.
Samtang, ginpahayag sang DepEd nga ang drill sa Agosto 25 magabulig sa mga school officials nga makita kon epektibo ang mga protocol sa school level kag mahibaluan ang mga kakulangan nga kinahanglan masulbar antes ini ipatuman.
