Ginpaandam sang Department of Education (DepEd) ang publiko nga indi obligado ang mga maestro, estudyante kag ginikanan nga mag-abono ukon maghatag sang kontribusyon para sa Brigada Eskwela.
Sa pahayag sang DepEd sang Biyernes, Hunyo 5, ginpabaskog sang ahensya ang hugot nga pagpatuman sang “No Collection Policy” nga nagadumili sa bisan ano nga pwersado nga pagpangayo ukon panukot sang kontribusyon gikan sa mga miyembro sang komunidad sang eskwelahan.
Suno sa DepEd, ang Brigada Eskwela indi isa ka fundraising activity kundi isa ka “whole-of-community” nga inisyatibo nga nagatinguha nga mapreparar ang mga eskwelahan antes mag-abri ang klase.
Ginpahayag man sang departamento nga padayon nila nga ginapalig-on ang suporta sa mga eskwelahan paagi sa School Maintenance and Other Operating Expenses (MOOE) kag sa bulig sang nagkalainlain nga ahensya sang gobyerno, lokal Government Units (LGUs), mga partner nga organisasyon kag mga volunteers.
Samtang, ginpatigayon ang Brigada Eskwela sa nagkalainlain nga eskwelahan sa bug-os nga pungsod halin Hunyo 1 tubtob Hunyo 5 bilang preparasyon para sa pagbukas sang klase sa Hunyo 8.
