Nagpatuman ang Department of Education (DepEd) sang mas istrikto nga mga penalidad batuk sa mga estudyante nga nalakip sa seryoso nga bullying, physical abuse kag iban pa nga mga binuhatan nga nagabutang sa peligro sa seguridad sa eskwelahan.
Kabahin ini sa DepEd Order No. 006, s. 2026, ukon Guidelines on Ensuring a Safe and Motivating Learning Environment (ESMLE), nga natalana sang nagkalain-lain nga penalidad depende sa kabug-aton kag pagbalik-balik sang paglapas.
Para sa mga serious offenses, pareho sang balik-balik nga bullying kag online harassment, mahimo nga hatagan sang suspension nga tubtob lima ka adlaw kag i-refer sa Department of Social Welfare and Development (DSWD) sa una nga paglapas. Mahimo naman ini magresulta sa non-readmission sa ikaduha nga paglapas kag exclusion sa ikatatlo nga paglapas.
Para sa mga high-risk acts, pareho sang grabe nga physical abuse, bomb threat kag delikado nga mga hoax, mahimo ipatuman ang non-readmission sa una nga paglapas, permanente nga exclusion sa ikaduha, kag referral sa mga nagakaigo nga otoridad.
Suno kay Education Secretary Sonny Angara, indi pagakompromisuhon sang DepEd ang seguridad sang mga estudyante, bisan pa ginahatagan sang kahigayunan ang mga naglapas nga magbag-o.
Samtang, mahimo magpatuman ang school head sang tubtob 30 ka adlaw nga preventive suspension samtang ginaiimbestigahan ang kaso, kun ginakabig nga padayon nga pamahog sa seguridad sang campus ang estudyante.
